damascus, Dahnon

بلد

سامر المصفي

 

يا بلدْ
شو انك بعيدة
متل الزمان

وزغيري متل فكرة
متل الهوى اللي بيفتح الشباك

من بعد نطرةْ متل شي بنت سمراْ
عم تحلم بفستان

متل شاعر بالعتمْ
ناطر قصيدة غزل
تَ بآخر السهرة
يضوّي بيوت الشام

يا شام
ما خلص الوجع فيكي ..
من وقت انصلب غَيلانْ وانتي اللي وجّك من دهبْ
قدّيس جايي من حلبْ
ماسح صليبو بزيت المعرّةْ ونادِر على بوابك
يرتّل صلاْ
من سورة الرحمن,

يا بلدْ
اسمِك شو حلو
وقديش كانو بيفهمو السريان
لما ع شي سكرة سموكي انتي الشمس
وخلو القمر… زعلان

عن سامر المصفي

سامر المصفي
مدوّن سوري - كتّاب دحنون

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.